家在晴朗的天空下

我留在家做全職媽媽後，天天極度痴身，對我要求多多，如除衫褲及喂飯等等。但我對佢的要求唔一定配合之餘，如果我拒絕佢的要求，佢就嬲，會鏟地或者打我，不過就唔係好大力。每日早上我叫佢起身返學亦係煎熬。因為佢每日都唔肯返學，迫佢返學佢就會要求我同佢洗臉刷牙食早餐換校服。由於早上時間緊迫，我只能做1、2樣就要趕去梳洗換衫準備送佢去校巴站。所以一滿足唔到佢，佢就大喊扭計。我每日都因為天天而心力交瘁，情緒問題又開始湧現。呢排我幾乎日日或打或呼喝沙翁仔，我其實唔想，但我真係忍唔到D脾氣。加上我實在休息太少，我更加難控制自己嘅情緒。究竟天天點解咁難湊？佢真係咁唔想返學？問題喺邊？轉校幫唔幫到？

St. Cat 名氣一直高企，每年都吸引不少家長報名。但經過今次面試，我對它大打折扣。

天天的面試時間是11:15am。我們因此於10:45am到達等候。一到學校，我們已經見到校外有一條長長的人龍。當日太陽非常猛烈，雖然校牆提供了遮蔭處，但天天一樣等到又倦又渴又餓，因為直到11:45am，我們仍然在校門外排隊，企足1小時！

好不容易入到學校，我們竟然還要排隊，幸好今次等待時間不算太久。不過，經過一輪等候，天天已經不耐煩了。

天天屬於粤語組。第一輪面試是分組玩Duplo Lego。每枱大約4-5位小朋友。老師一開始與小朋友一一打招呼後，便立於一旁寫分數。大約15-20分鐘後，我們便去了另一課室進行第二輪面試。

第二輪面試是單對單形式。一位老師對一位小朋友，一位家長則坐小朋友旁邊填問卷。老師首先問小朋友自己的名字及坐旁邊的是小朋友的什麼人。老師接着便拿出2張過膠6格圖咭，一張6格內有6張不同的水果圖，另一張只有2格有水果圖。老師要求小朋友按第一張咭不同水果的排列方法將相同的水果圖放在第2張咭的相對應地方。接着，下一條題目是切砌圖。砌圖是用過膠咭紙做成，圖片是一架飛機。之後，老師拿出一堆珠仔叫天天揀選指定顏色的珠仔，再將其串成一串。完成後，老師再叫天天去後面的手推車上拿取小鴨及汽車回來給她。最後，老師送給天天一包餅乾，與我們道別。

總括而言，有些題目對天天來說比較深，加上等待時間太長，天天表現不算好，不過作為媽咪，我覺得天天能夠保持心境平和已經很不錯，畢竟他只是2歲多。

KClS係天天嘅第一場面試。面試只有一次，以遊戲方式進行，全英語面試，並無複試及家長面試。面試由一位家長陪同，時間為20分鐘，10分鐘前要到達，遲到不准入試場。

因為天天主要語言係廣東話，我雖然喺成為全職媽媽後有幫佢操練，但咁短時間真係無法令佢可以英語對答，所以我地今次盡左力就算。

面試時間一到，我地就一齊入班房。天天得知我可以陪佢不知幾開心。我唯有提醒佢一陣要自己玩唔好痴實媽咪。班房分2張枱，6位小朋友一張枱，家長無位坐，只可半蹲係小朋友隔離。枱上面有一堆細小嘅膠粒及一些細小嘅膠公仔，分別有大人、小朋友、BB及貓咪。

面試老師只有一位，係一位操流利英語嘅華人。由於天天無登記英文名，所以一開始老師就問我天天嘅英文名。所有小朋友一坐低就各自玩玩具，而老師就圍繞小朋友的動作同小朋友互動。老師會教小朋友玩玩具，觀察小朋友的反應。老師亦會逐一問小朋友問題，例如叫天天俾粒藍色嘅膠粒老師、建議佢放個人喺佢用膠粒切嘅火車上等等。老實講，每次老師叫天天個英文名，天天喺有望下個老師，但完全無答老師問題，只係用廣東話同我講野😅 ，中間只係夾雜左一個英文字，就係train(即使我不停咁用英文同佢講)。到時間差不多嘅時候，老師就行開喺咁mark分，之後鈴聲一響，大家就要走了。不過天天無即刻走，佢好堅持咁切埋自己架膠粒火車先起身。起身後，天天自發泊好張櫈，再同老師講Bye Bye (嗱，呢句就係唯一一句講左嘅英文喇)。

天天出世後回到職場，我發現公司已然變天，經合併及重組後，人手自然流失了一大半，自己亦被調至新崗位。我因為要適應及學習新崗位，又要面對人手短缺，工時長令到我十分掛念天天，加上新請的菲傭令人放心不下，最終我於辭退工人的同時亦呈上自己的辭職信。

不過我當時只是打算離開職場一段短時間，所以在家的時候，我除了調教新工人及陪伴天天，便是尋找方便我照顧家庭的新工作。數月後，我成功找到一份離家不遠而工時不算非常長的工作。

天天出世後2年多，我們迎來了一位小公主 - 晴晴。可能天天剛步入Trouble Two，晴晴的出現令天天得到的關注大減，天天出現一些情緒及行為問題，加上屋企的問題，我患上產後抑鬱。由於教養孩子是一項無法假手於人的責任，我與丈夫及家人商量後決定暫別職場一段時間，好好陪伴天天及晴睛。

成為全職媽媽後，我希望透過此Blog記錄及分享自身體驗及育兒點滴。